Garsoore Xasan Aaden Xaaji Yabarow (Wiish) iyo kalkaaliyaal ka socda dalka Soomaaliya ayaa ku sugan magaalada Bujumbura ee dalka Brundi halkaasoo ay ku dhexdhexaadin doonaan cayaar ka tirsan tartanka isreereebka koobka Confederations Cup ee qaaradda Afrika oo berrito ku dhexmari doonta kooxaha Lydia LB Academic (Brundi) iyo kooxda Police ee dalka Rwanda.

Sida lagu soo bandhigay shabakadda xiriirka kubadda cagta ee qaaradda Africa (CAF) garsoorayaasha Soomaliyeed ayaa ka mid noqon doona garsoorayaasha iyo kalkaaliyayaasha sida joogtada ah uga mid noqon doona garsoorka cayaaraha caalamiga ah ee uu xiriirkano qabto ka dib markii uu Xiriirka Soomaaliyeed ee Kubadda Cagtu buuxiyey shuruudihii iyo adeegii ay garsoorayaasheenu uga baahnaayen si ay uga mid noqdaan bahda garsoorka qaaradda.

Waxaan hadaba la xariiray garsooraha cayaartan dhexdhexaadin doona Xasan Wiish oo ku sugan magaalada Bujunbura waxaanan wax ka waydiiyey sida ay suuragalka ku noqotay in afar garsoore oo ka socda Soomaaliya xiligan garsooraan cayaar ka dhacaysa dalka dibaddiisa ayadoo la ogsoon yahay xaaladda dalka waxa uuna ii sheegay in dadaal wayn oo ay sameeyeen xiriirka kubadda cagta Soomaaliyeed iyo garsoorayaasha soomaaliyeed intuba oo isugu jiray tababaro loo furay garsoorayaasha, shahaadooyin ay ku guulaysteen iyo garsoorayaasha oo ayaguna buuxiyey shuruudihii looga baahnaa ayaa suuragaliyey in aan maanta u joogaan dalka Brundi dhexdhexaadinta cayaar ka mid ah kuwa qaaradda.
 
Xasan ayaa dhinaca kale tilmaamay in garsoorayaasha Soomaaliyeed laga darajeeyo qaaradda taasoo ay horey u sameeyeen garsoorayaashii hore ee dalka ayaguna ay rajaynayaan in ay sii wayneeyaan darajadaas isla markaana dib u soo celiyaan sumcaddii garsoorayaasha dalkeena ayagoo kaashanaya XSKC oo dadaalkooda iyo waxqabadkooda ku aadan sidii ay u tayeyn lahaayeen garsoorayaasha uu yahay mid aan la dafiri Karin.

Cayaartan oo berrito oo axad ah ka dhici doonta dalka Burundi ayaa waxaa garsoori doona garsoore Xasan Wiish oo horey u soo qabtay cayaaro badan oo ka tirsan qaaradda, qaarkoodna ay Final ahaayeen, waxaa dhinaca calanwadayaasha ka caawin doona garsoore Saalax Cumar Abuukar (Calanhaye 1 aad) iyo garsoore Xamsa Xaaji Cabdi (Calanhaye 2 aad) halka uu garsooraha kaydka ahina noqon doono garsoore Bashiir Colaad waxaanan ay guushani noqon doontaa mid ay ku faanaan garsoorayaasha iyo XSKC waxaanan u rajaynaynaa in ay ku guulaystaan hawshan loo igmaday.