Bahda sport ga magaalada Manchester ayaa martiqaad aad u balaaran u fidisay ururo dhawr ah oo ka shaqeeya horumarka sport ga iyo dhalinyarada ku dhaqan dalkan UK kaasoo maalinimadii sabtidii aynu soo gudubnay ka dhacay isla magaaladaasi Manchester.

Kulankan oo muhiimaddiisu ahayd sidii ururada ku kulmay halkaasi ay isaga kaashan lahaayeen horumarka sport ga guud ahaan isla markaana ay uga qayb qaadan lahaayeen sidii ay gacan uga gaysan lahaayeen dib u dhiska sport ga dalka ayadoo mudadii maalinta dhan ahayd ee kulamadaasi socdeen lagu lafa guray arimo badan oo dhamaantood waxtar u leh bahda sport ga UK iyo dalka intaba.

Kulankan ayaa sidoo kale waxaa taageero hagar la'aan ah loogu muujiyey guddiga cusub ee Olimbikada Soomaaliyeed ayadoo isla markaana hambalyo iyo bogaadin loogu diray XSK Kolayga iyo xulkii qaranka ee wiilasha kubadda kolayga oo wacdaraha ka dhigay tartankii Zone 5 ee ka dhacay dalka Tanzaaniya.


Waxaa la iskula soo qaaday kulankan sidii ururada Manchester, SSUK iyo ururka Horumarinta Sport ga ay isaga kaashan lahaayeen tayeynta dhaqdhaqaaqyada sport ee ay ururadani wadaan iyagoo iskaashanaya isla markaana u horseedaan bahda sport ga UK in ay hal meel isugu yimaadaan.
 
Kulankan ayaa waxaa fikirkiisii iyo iskuxirkiisii ugu horeeyey lahaa guddoomiyaha ururka Horumarinta Sport ga Soomaaliyeed Axmed-Nuur Maxamed xaashi (Sayga) ka dib markii uu bahda Manchester iyo ururka SSAUK ku martiqaaday kulan hordhac ahaa oo ka dhacay magaaladan London kaasoo ka dibna lagu go’aamiyey in kulanka wayni ka dhaco magaalada Manchester.

Odayaasha Marjaca bahwaynta Manchester oo ugu horeyn furay kulanka ayaa ku soo dhaweeyey bahda reer UK ee martida ku ahaa magaaladaasi kulana dardaarmay in kulamada noocaan oo kale ah la joogteeyo isla markaana laga miradhaliyo.

Sidoo kale bahda Sport ga Manchester oo dhinacyo badan oo ka mid ahi ka hadleen kulankan ayaa aad ugu mahadceliyey bahwayntii kala qaybgashay kana ajiibtay martiqaadkaasi waxayna u balan qaadeen in ay dhinacooda hiil iyo hooba la garab istaagi doonaan sidii ay heshiisyadani u mira dhali lahaayeen.

Guddoomiye Axmed-Nuur Maxamed xaashi iyo guddoomiyaha SSAUK Cabdiraxiin Cali Diiriye ayaa ayaguna dhinacooda uga mahadceliyey reer Manchester sida sport jacaylka ah ee ay u soo dhaweeyeen waxayna sidoo kale balan qaadeen in ay sii adkayn doonaan heshiisyadan oo ay rajaynayaan in ay miradhalaan.

Avv Xuseen Diiriye ayaa ku amaanay reer Manchester wanaaga faraha badan ee ay tuseen wuxuuna dhinaca kale qiray hawsha baaxadda leh ee uu Axmed-Nuur Sayga iyo ururka Horumarintu ka qabteen sidii ay bahwaynta sport ga isugu keeni lahaayeen wuxuuna u rajeeyey ururadan kuwa ka dhabeeya heshiisyadan ay galeen una horseeda bahda UK horumar.

Guddoomiyayaasha ururada Horumarinta Sport ga iyo SSAUK, odayga bahwaynta Sport ga Avv Xuseen Diiriye, cayaaryahankii hore ee qaranka Xasan Xuseen, madax iyo xubno ka tirsan ururadan iyo qaar ka mid ah cayaartoydi hor iyo barnaamijka cayaaraha ee TV ga Universal ayaa ka mid ahaa wafdi aad u balaaran oo magaalada London uga qaybgalay kulankaasi ayagoo sida ay sheegeen ay aad ugu qanacsanaayeen sidii uu ku soo dhamaaday kulanka ayna hubaan in mirahiisa la arki doono dhawaan.