|    Register
 
Article Details
Bahwaynta sport ga oo ku midoobay aragtida xulka qaranka kubadda kolayga.

Xulka kubadda kolayga Soomaaliyeed ayaa goor dhawayd waxaa looga adkaaday cayaartoodii ugu dambaysay tartankan taasoo ay uga hortageen xulka dalka Kenya 63-70 dhibcood , halka xalay cayaartoodii semi-final ka ahayd oo ay uga hortageen xulka haysta horyaalka tartankan ee dalka Rwand na looga adkaaday si dirqi ah 86-83 dhibcood ayadoo bahwaynta sport ga Soomaaliyeedna ka bixiyeen guuldarooyinkaasi aragti midaysan.

Inkastoo aan tartankan ka galnay kaalinta afaraad ayaa hadana guuldarooyinkan iyo labadii guulood oo ka horeeyey maxay macalimiinta xulka, maamulka XSKK iyo macalimiintii iyo cayaartoydii hore ka yiraahdeen anagoo soo aruurinay fikradihii ay soo jeediyeen oo dhamaantood aad isugu dhawaa.

Macalimiinta xulka qaranka Cumar C/Qaadir Baarajab iyo Bashiir Fox oo la hadlayey barnaamijka cayaaraha ee telifishanka qaranka ayaa sheegay in aan laga badin maanta balse ay xulkeenu guulaysteen marka laga fiiriyo diyaargarawga xulka iyo heerka ay gaareen ayagoo dhinaca kalena guul ku tilmaamay rikoorka cusub oo uu cayaaryahanka Soomaaliyeed ka dhigay cayaaraha kubadda kolayga qaaradda Afrika.

Macalin Fox ayaa dhinaca kale tibaaxay in cayaarahan iyo guulihii dabasocdayba ay abuureen jawi isjacayl iyo isku duubnaan leh loona baahan yahay in la xajiyo iskuduubnidaas lana sii balaariyo isla markaana loo diyaargaroobo si wadajir ah cayaaraha ku soo fool leh xulka qaranka.

Xoghayaha Guddiga Olimbikada Soomaaliyeed Duraan Axmed Faarax oo daawanayey cayaartii ay xulkeenu uga hortageen Rwanda ayaa ku tilmaamay cayaartoyda Soomaaliyeed geesiyaal mudan in lagu xuso taariikhda wuxuuna ku amaanay XSKK dadaalka faraha badan ee ay u galeen sidii ay uga mira dhalin lahaayeen in ay dib u soo celiyaan sumcaddii Soomaalidu ku lahayd kubadda kolayga qaaradda Afrika wuxuuna talaabo horumar leh ku sheegay isku duubnida soo iftiimaysa ee ay muujiyeen bahda kubadda kolayga Soomaaliyeed.

Duqa Magaalada Mogadishu Mudane Maxamuud Axmed Nuur (Tarzan) oo la hadlayey telifishanka qaranka cayaartii Rwanda ka dib ayaa kula dardaarmay bahwaynta sport ga in laga gudbo khilaafka aan macnaha ku dhisnayn oo aan wax horumar ah keenayn loona gudbo taageero iyo in la isku duubnaado taasoo ah jidka kaliya ee horumar aan ku gaarsiin karno sport ga iyo dhalinyarada Soomaaliyeed. Asagoo ka hadlayey dhinaca cayaartoyda ayuu ku amaanay dadaalkooda wuxuuna gobol ahaan u fidiyey martiqaad haddii ay awoodaan in ay soo maraan magaalada Mogadishu, haddii ay dhacdana waxa uu sheegay in ay si wayn u soo dhawayn doonaan.

Macalimiintii hore ee xulka qaranka kubadda kolayga Soomaaliyeed Xasan M Faarax (John) iyo C/Raxmaan Guhaad (Shiino) oo ayaguna xalay ka qaybqadanayey barnaamijka cayaaraha ee tefishanka qaranka ayaa dinacooda ku amaanay dadaalka ay macalimiinta iyo xiriirkuba u galeen sidii ay cayaartoy taya leh u keeni lahaayeen iyo waliba dadaalka dheeraadka ah ee ay cayaartoydu muujiyeen waxayna si wada jir ah dhinacooda u soo dhaweeyeen in la helo isku duubni iyo diyaargarow si wadajir ah looga qaybqaato kaasoo lagu horumarinayo kubadda kolayga Soomaaliyeed.
 
Cayaaryahankii hore ee naadigii kubadda kolayga ee Jeenyo Axmed Bile oo asaguna ka hadlayey studiyaha telifishanka qaranka ayaa si qiiro leh u taageeray xulka qaranka iyo dadaalka hagar la’aanta leh ee ay madaxda iyo macalimiintu u galeen diyaargarowga tartankan wuxuuna ku sii adkeeyey bahwaynta sport ga in la taageero cid waliba oo ka shaqaynaysa horumarka sport ga dalka.

Waxaa ayaguna dhinaca taleefanada uga qaybqaatay qaar badan oo ka mid ah bahwaynta sport ga oo isugu jiray cayaartoy, macalimiin iyo taageerayaal kuwaasoo dhamaantood muujinayey taageerada iyo wanaaga ay u hayaan dhamaan intii gacanta ka gaysatay qabanqaabada xulka qaranka waxaana ay xalay igu abuurtay arintani dareen cusub oo ah in ugu yaraan talaabo muhiim ah horey loogu qaaday sidii looga wada shaqayn lahaa horumarka sport ga dalka.


Written By: Mohamud
Date Posted: 1/26/2013
Number of Views: 753

Return

Copyright 2006 Nissit Ltd     |    Privacy Statement    |    Terms Of Use