|    Register
 
Article Details
Ururada UMQIS, SSAUK iyo Jaaliyadda Sport ga Manchester oo kulmay.

Kulan diiradda lagu saarayey siyaabaha ugu haboon ee ay wada shawqayn waarta ku dhexmari lahayd ururada Midaynta Qurbajoogta, SSAUK iyo jaaliyadda sport ka ee magaalada Manchester uuna fikirkeeda iyo qabanqaabadeeda lahaa guddoomiyaha ururka Midaynta QS Axmed Nuur Maxamed Xaashi ayaa ka dhacay magaalada London.

Xubno ka mid ah odayaasha marjaca, guddiga dhalinyarada ee Manchester iyo guddiga sport ga magaaladaasi oo ka jawaabayey martiqaadkii guddoomiye Axmed-Nuur Sayga ayaa ka soo qaybgalay kulankan halka guddoomiye ku-xigeenka ururka UMQIS iyo guddoomiyaha ururwaynaha SSAUK uu ayaguna goob jog ka ahaayeen waxaana ismarxabayn iyo soo dhawayn ka dib la guda galay doodihii iyo fikradihii ku aadanaa sidii loo horumarin lahaa xiriirka bilowga ah ee ka dhexeeya ururadan loogana miradhalin lahaa wax wada qabsi dhab ah oo dhexmara ururadan u taagan sare u qaadida xirfadaha sport ee dhalinyarada iyo ubadka Soomaaliyeed.

Axmed Nuur Maxamed Xaashi (Sayga) ayaa tilmaamay in ay aad muhiim u tahay in labada bah ee London iyo Manchester la mideeyo cududooda si ay u fududaato in ay awood ugu helaan caawinta walaalahooda kale ee ku mashquulsan sport ga kuna nool dalka gudihiisa waxaana uu kula dardaarmay in ay ka shaqeeyaan sidii looga dhabayn lahaa midnimadaasi.

In si wadajir ah looga wada shaqeeyo isla markaana la iska kaashado tartamada iyo safarada ay qabanqaabiyaan ururadana ku kala nool waqooyiga iyo bariga dalkan Ingiriiska isla markaana ay wakiilo isaga ahaadaan goobaha ay kala joogaan ayaa ka mid ahaa qodobadii looga hadlay kulankan iyo waliba in la qabto aqoon iswaydaarsiyo lagu baadigoobayo midnimada bahda sport ga ee dalkan UK.

Jaaliyadda Sport ga ee Manchester oo ayaguna dhinacooda ka hadlay kulankan ayaa uga mahadceliyey ururka Midaynta Qurbajoogta Sport Ga Soomaaliyeed iyo odayga Soomaaliyeed ee Axmed Nuur Sayga martiqaadka waxayna sheegeen in ay aad ugu faraxsan yihiin isbarashadan iyo xiriirkan wada shaqayneed ee dhidibada loo aasay waxayna balan qaadeen dhinacooda in ay ka shaqayn doonaan sidii horey loogu soo wadi lahaa xiriirkan ayagoo dhinacoodana u fidiyey labada urur ee UMQIS iyo SSAUK martiqaad ay kula kulmaan dhamaan bahwaynta Manchester si loo sii balaariyo isla markaana looga doodo sidii wax loo wada qaban lahaa.

Dhinaca kale bahda sport ga Manchester ayaa sidoo kale ku martiqaaday ururada UMQIS iyo SSAUK iyo madaxdoodaba in ay kala soo qaybgalaan xaflad casho sharaf ah oo lagu sii sagootinayo Fuaad Cusmaan oo ka mid ah xubnaha ugu firfircoon bahwaynta Manchester runtiina ah shaqsi wax badan ka soo qabtay horumarka dhalinyarada iyo sport ga Manchester taasoo ay aqbaleen reer London lana filayo in ay ka qaybgali doonaan.

Guddoomiyaha ururka SSAUK C/Rixiin Cali Diiriye ayaa ugu horeyn uga mahadceliyey mudane Axmed Nuur martiqaadkan iyo sidii uu had iyo goor ugu dadaalayo midaynta bahwayntan sport ga wuxuuna dhinacooda SSAUK ahaan u balan qaaday in ay wada shaqaynta ay la leeyihiin ururkan Midaynta ay adkayn doonaan isla markaana horey u sii wadi doonaan halka uu bahda reer Manchester na ka codsaday in ay ayaguna kala shaqeeyaan midnimada cududa bahda sport ga UK taasoo ah qaabka kaliya ee waxtar dhab ah loo heli karo.
 
C/Rixiin ayaa dhinaca kale ka raali geliyey kooxda Manchester ee kubadda cagta oo uu goob joog ahaa macalin Faarax Caddow oo ka mid ah macalimiinta kooxdaasi haddii ay tirsanayaan wax qaladaad ah wuxuuna dhinaca kale ku martiqaaday ka soo qaybgalka tartanka kubadda cagta ee kulaylaha 2013 ka uu qabanqaabinayo ururwaynaha SSAUK.
Gabagabdii kulankan ayaa waxaa laga soo saaray go’aamo dhawr kuwasoo la soo gaarsiiyey shabakaddan cayaaraha.com waxayna kala ahaayeen

• In kulanka labaad oo ah mid balaaran oo dhexmara saddexdan dhinac uu ka dhaco magaalada Manchester.
• In hadafkan ah in la mideeyo isla markaana meel la isugu geeyo cududa bahwaynta sport ga UK la gaarsiiyo cid kasta oo ka shaqeeya sport ga oo ay ururadani xiriir hoose la leeyihiin.
• In ururadani si wada jir ah uga shaqeeyaan tartamada ay qabtaan sida kan kulaylaha ee SSAUK iyo safarka ay ururka midayntu ku aadaan dalka Talyaaniga bilowga sanad waliba.
• Iyo ugu dambayntii in la sii wado wada tashiga isla markaana la joogteeyo kulamada ilaa iyo inta laga gaarayo hadafka ah midnimada bahdan.

Kulankan ayaa waxaa goob jog ka ahaa:

Guddoomiyaha UMQIS Axmed Nuur Maxamed Xaashi (Sayga)
Guddoomiyaha SSAUK C/Rixiin Cali Diiriye
Guddoomiye ku-Xigeenka UMQIS Maxamed Khaliif
Cali Ugaas oo ah xubin guddiga marjaca Manchester
Macalin Maxamuud Geeseey (Manchester basketball coach)
Macalin Faarax Caddow ( Withwork PSC Coach)
Axmed Dacaani (Guddiga dhalinyarada Manchester)
Muxiyaddiin iyo Maxamed oo ka mid ah xubnaha bahwaynta Manchester.

Written By: Mohamud
Date Posted: 12/25/2012
Number of Views: 453

Return

Copyright 2006 Nissit Ltd     |    Privacy Statement    |    Terms Of Use