|    Register
 
Article Details
Cayaaryanahnaka Chelsea iyo qaranka Ingiiska Mukhtar Ali oo London lagu dhiirigeliyey.

Waxaa xalay lagu qabtay waqooyiga magaalada London xaflad dhiirigelin iyo duco isugu jirtay oo ay bahda sport ga qaarkood ugu talagaleen cayaaryahanka Soomaaliyeed ee da’da yare una cayaara kooxda Chelsea iyo xulka da’yarta qaranka dalkan ingiriiska Mukhtaar Ali (Afgooye).

Xafladdan oo ay soo qabanqaabiyeen isla bahdani uuna ka soo qaybgalay cayaaryahan Mukhtaar ayaa waxaa aad loogu dhiirigeliyey cayaaryahanka dadaalkiisa ku aadan kubadda cagta ayadoo dhamaan odayaashii iyo cayaartoydii hore ee joogtay halkaasina ay u muujiyeen Mukhtaar sida ay ugu faraxsan yihiin horumarkiisa ayna u soo dhawaynayaan.

Guddoomiyaha ururka midaynra qurbajoogta Sport ga Axmed Nuur Maxamed Xaashi (Sayga) ayaa ku amaanay aabaha dhalay wiilkan Ali Afgooye barbaarintii iyo dulqaadkii uu u muujiyey wiilkiisa sidii uu horumarkiisa u sii wadan lahaa taasoo uu sheegay in looga baahan yahay waalidiinta kale ee Soomaaliyeed in ay ku daydaan, wuxuuna sidoo kale u sheegay cayaaryahan Mukhtaar in dhamaan jaaliyadda soomaaliyeed eek u dhaqan dalkan Ingiriiska ay ku faraxsan yihiin horumarkliisa iyo waliba magaca iyo sharafta Soomaaliyeed ee uu sare u qaaday maadaama uu ka mid noqday xulka qaranka dalkan sida aadka ah u soo dhaweeyey shacabka soomaaliyeed.

Avv Xuseen Diiriye, C/Qaadir Isoomareey, Maxamed Ciise (Digeeye) oo ayaguna ka mid ah odayaasha bahwaynta sport ga London oo ka hadlay casho sharaftan ayaa ku dhiirigeliyey Mukhtaar in uu sii kordhiyo dadaalkiisa iyo waliba waxbarashadiisa taasoo sharaf iyo magacba u soo jiidaysa dhamaan Soomaali meel kasta oo ay joogaan.

Wasiir ku-xigeenkii hore ee wasaaradda Sport ga Cali Afgooye oo ah aabaha dhalay wiilkan oo ka hadlay xafladda ayaa waxa uu uga mahadceliyey dadkii soo abaabulay xafladdan asagoo sheegay in markii loo sheegay in bahda sport ga magaaladani ay qabanqaabinayso casho sharaf lagu dhiirigelinayo wiilkiisa uu aad ugu farxay isla markaana dareemay in shacabka Soomaaliyeed si la mid ah qoyskiisa ay ugu faraxsan yihiin horumarka wiilkiisa.

“Markii wiilkayga uu gadaal ka soo galay cayaartii ay xulka qaranka 16 jirada Ingiriisku uga hortageen xulka dalka Wales runtii markii magaciisa la sheegay waxba iskama kay badalin laakiin markii lagu daray magaca dalkeena Soomaaliya runtii xaadayda oo idil way istaagtay, in aan arko dadkiisii oo caawa ku dhiirigelinaya horumarkiisana way iiga sii daraysaa” ayaa ka mid ahaa hadaladii qiirada badnaa ee uu Cali Afgooye ka yiri cashadii xalay.

“Mukhtaar waa wiilkiinii, horumarkiisa iyo wanaagiisuna waxa ay dib ugu soo laabanaysaa magaca Soomaaliyeed waxaanan ku talinayaa in aad sidan oo kale u dhiirigelino isla markaana u garab istaagno dhalinyaradeena si wada jir ah waxaanan ilaahay uga baryayaa in ducada caawa halkan laga soo jeediyey ilaahay u aqbalo” ayuu ku soo gabagabeeyey Cali Afgooye oo ay ka muuqatay farxad aad u badan.

Madaxa barnaamijka cayaaraha ee TV ga Universal, cayaaryahankii hore ee naadigii Betroolka C/qaadir Maxamed faarax (Biriq) ayaa halkaasi asaguna ka soo jeediyey taariikh kooban oo ku saabsan cayaaryahankan iyo qaabkii uu ku bilaabay cayaaraha halka uu weriyaha isla barnaamijkaasina C/naasir Sola uu asaguna daadihinayey xafladda waxaana ay balan qaadeen barnaamij ahaan in ay kordhin doonaan dhiirigelinta ubadka yaryar iyo dadka ka shaqeeya gaar ahaan Mukhtaar ayna soo dayn doonaan barnaamijyo ku aadan xiddigan.






Written By: Mohamud
Date Posted: 11/25/2012
Number of Views: 1302

Return

Copyright 2006 Nissit Ltd     |    Privacy Statement    |    Terms Of Use